Month: February 2021

Caritas Manila, naghahanap ng mga volunteer

Patuloy na naghahanap ang Caritas Manila ng mga nais maging volunteer at maging lingkod ng social arm ng Archdiocese of Manila.

Sa panayam ng programang Caritas in Action, sinabi ni Ms. Armielyn Sta. Maria, Formation Coordinator ng Caritas Manila Institute of Servant Leadership and Stewardship o Caritas Manila-ISLaS, na bukas ang kanilang tanggapan para sa mga gustong maging kabahagi ng pagtulong sa mga mahihirap at nangangailangan.

Kasabay ng pagpapatupad ng alert level 1 sa Metro Manila, mas naging aktibo ang Caritas Manila-ISLaS sa mga on grounds activity na nangangailangan ng mga indibidwal na ninanais makapaglingkod ng walang hinhintay na anumang kapalit.

Sinabi ni Sta. Maria na maaaring makipag-ugnayan sa tanggapan ng Caritas Manila ang mga nais maging miyembro ng ISLaS Volunteers.

“Pagkakataon na po natin ito na yun may mga mabuting puso at bukal ang kanilang kalooban sa paglilingkod sa kapwa kami po ay bukas para sa mga kapanalig na gustong magbigay ng paglilingkod,” pahayag ni Sta. Maria.

Kahit anong edad at katayuan sa buhay ay maari maging volunteer ng Caritas Manila.

“As long as kayang magbigay ng serbisyo, sa ngayon yung mga Senior [Citizen] nilalagay natin sa council of Elders, si Caritas Manila po walang tinatanggihan kung gustong maglingkod, sila ay merong papalooban na programa para sila ay makatulong pa sa mas nakakarami,” pahayag ni Sta.Maria

Nagpapasalamat naman ang Caritas Manila sa may 2,500 volunteers nito sa Arkidiyosesis ng Maynila na hindi matatawaran ang pagseserbisyo para sa mga mahihirap lalo na sa kasagsagan ng mga quarantine restriction dahil sa COVID-19.

Magugunitang sa kabila ng pandemya ay naging aktibo ang Caritas Manila sa pamamahagi ng ayuda katuwang ang ilang mga pribadong sektor.

Taong 2020, nang maipamigay sa pamamagitan ng Oplan Ugnayan ng Caritas Manila at private sector ang may mahigit 1 bilyong pisong halaga ng gift certificates sa National Capital Region at mga karatig lalawigan para sa mga mahihirap na naapektuhan ng nationwide lockdown sa pangunguna ng mga volunteers.

Caritas Manila, nagpadala ng tulong pinansiyal sa Caritas Ukraine

Nagpadala ng isang milyong piso na tulong pinansiyal ang Caritas Manila para sa Caritas Ukraine.

Ito ay bilang pakikiisa sa patuloy na humanitarian efforts na ginagawa ng Caritas Ukraine para sa mga mamamayan na naapektuhan ng digmaan sa pagitan ng Russia at Ukraine.

Una nang nakipag-ugnayan si Caritas Manila Executive Director at Radio Veritas President Rev. Fr. Anton CT Pascual kay Caritas Internationalis President at dating Manila Archbishop Luis Antonio Cardinal Tagle upang ipahayag ang kagustuhan ng Manila-based Caritas na magpadala ng tulong sa Ukraine.

Sa naging panayam ng Radyo Veritas kay Fr. Pascual,sinabi nito na ang Caritas Manila ay nakikiisa sa panawagan ng kapayapaan at naniniwala siyang walang sinuman ang nananalo sa digmaan.

Una nang umapela ng pagkakaisa at tulong pinansiyal ang Caritas Ukraine para sa mga mamamayan ng kanilang bansa na naiipit sa kaguluhan.

Sa isang panayam ng Rome-based media agency na Vatican News kay Cardinal Tagle, sinabi nito na labis ang kanyang nararamdamang kalungkutan dahil sa epekto ng patuloy na nagaganap na digmaan.

Umaasa ang Kardinal na hindi pa rin mawawala ang pag-asa na magkakaroon ng usaping pangkapayapaan at matitigil na ang alitan ng dalawang nasabing bansa lalo na bilang paggunita sa panahon ng kuwaresma.

“As Christians, we must trust that hope is always in God. In this season of Lent, the Church – through the Readings – invites us to renew our hope in Jesus Christ. And this hope means the triumph of love, of mercy. We now see concrete signs of this hope. No gun can kill hope, the goodness of the spirit in the human person. There are so many testimonies to this. The hope in Jesus Christ and His Resurrection is true and is seen precisely in the testimony of so many people.” Bahagi ng panayam ng Vatican News kay Cardinal Tagle.

Batay sa datos ng World Population Review tinatayang nasa 43.3 milyong ang populasyon ng Ukraine bago nagsimula ang paglusob ng Russia.

Marami sa mga pamilya ang nagsilikas na sa mga katabi nitong bansa habang ang ilang ay nasa pangangalaga ng mga institusyon ng Simbahang Katolika.

1500 scholars ng Caritas Manila, magtatapos ngayong 2022

Higit sa isang libo at limang daan scholars ng Caritas Manila ang inaasahang magsisipagtapos ngayong taon sa kabila ng krisis na dulot ng pandemya.

Ito ang inihayag ni Ms. Maribel Palmitos, Program-in-Charge ng Youth Servant Leadership and Education Program o YSLEP ng Caritas Manila kaugnay sa pagpapatuloy ng kanilang scholarship program sa mga mahihirap na kabataan sa iba’t-ibang panig ng bansa.

Ayon kay Palmitos, sa kabila ng epekto ng pandemya at pinsala na iniwan ng bagyong Odette partikular sa Visayas at Mindanao ay aabot sa isang libo limang daan at apat na pu’t anim (1,546) na scholars ang magsisipagtapos ngayong School Year 2021 – 2022.

Aminado si Palmitos na naging matatag at nagsumikap ang mga kabataan na ipagpatuloy ang kanilang pag-aaral sa kabila ng mga suliranin tulad ng pagharap sa blended learning education at iba pang mga pagsubok na dala ng kahirapan.

“Meron tayong ine-expect na 1, 546 na ga-graduate ngayong 2022, inaasahan natin na talagang sila ay subok na sa mga challenges kasi nag-pandemic tapos nagkaroon ng bagyo at lahat sila nagsusumikap at nakaka-inspire sila kasi sinasabi nila makakabangon din tayo,” paglalahad ni Palmitos sa panayam ng programang Caritas in Action.

Sa kabuuan ay mayroong apat na libo, anim na raan at tatlumpu’t siyam (4,639) na scholars ang Caritas Manila sa buong Pilipinas.

Bagamat humarap sa pagsubok na dala ng pandemya, mas tumaas ang bilang ng mga scholars ng Caritas Manila ngayong kasalukuyang taong pampaaralan.

Noong school year 2020 to 2021 ay mayroon lamang 3,960 na scholars sa ilalim ng YSL Program.

“Mas marami ngayon pandemic na nag-apply ng [scholarship] kasi mas marami ang nangangailangan ng tulong lalo na sa panahon ngayon na maraming mga magulang ang nawalan ng hanapbuhay,” paliwanag pa ni Palmitos.

Nagpapasalamat naman ang Caritas Manila sa patuloy na pagbabahagi ng tulong at suporta ng marami sa mga mananampalataya para maipagpatuloy ng mga mahihirap na kabataan ang kanilang kagustuhan na magkaroon ng sapat na edukasyon at mapaganda ang kanilang buhay.

“Sa lahat ng mga donors, sa mga volunteers at sa mga nagbibigay sa atin gaano man kalaki basta mula sa puso maraming salamat po sa inyong tulong at kami po ay bukas loob na nagpapasalamat at umaasa na marami pa tayong matulungan sa mga darating na panahon,” ani pa ng Program Head ng YSL.

Batay sa isang pag-aaral noong taong 2017, lumalabas na 23 porsyento lamang ng mga Pilipino ang nakakatapos ng kolehiyo dahil sa kawalan ng sapat na pagkukunan ng pangtustos sa pag-aaral.

sinisikap ng Caritas Manila na magbigay ng pagkakataon sa mga mahihirap na kabataan na makatapos ng kolehiyo para sa mas magandang oportunidad at kinabukasan.

BE A #GIFTEDTOGIVE DONOR TODAY.

Caritas Manila is the leading social arm of the Archdiocese of Manila and the integrator of the Church social services and development in Metro Manila.

Contact Us

Caritas Manila is always at your service

Give Us a Call
+632 8562-0020 to 25


© 2022 Caritas Manila | Powered by: iManila